اهم 5 افكار تعطيك انوثه طاغيه

 

أهم اشياء تعطيك أنوثة طاغيه

تحسين فيها و يحس فيها اللي حولك كلهم ".

1- اهتمي بصحة وشكل جسمك لأنه (رمز الأنوثة)

جسم المرأة من قبل آلاف السنين والبشر يصنعون له تماثيل.. لأنه جميل وساحر ويرمز للحياة

اهتمي بجسمك و احرصي على الحركة والرياضة والأكل الصحي.. واذا فيه شي واحد لازم تركزين عليه لأنه راح يمنع او يحل مشاكل صحية وجمالية كثير) هو : لا تسمحين لنفسك تسمنين او وزنك يزيد بشكل خارج عن السيطرة مو بس عشان الشكل الخارجي .. نو عشان نظرتك لنفسك واحساسك بالثقة من جوا .. ترى السمنه تأثر على طريقة التفكير 1000000%

2-اوزني نبرة صوتك وتكلمي بهدوء ولا تصارخين ابدا

الكلام بنبرة صوت موزونة و هادية يعطي جاذبية و انوثة ساحره لأنه يعطي انطباع ( انك واثقه من نفسك و عارفة وش قاعدة تقولين

الكلام بسرعة معناته ان الوحدة مستعجلة او ثرثارة

والكلام بصوت عالي يعطي ان الوحدة معصبة او متوترة او ماعندها سيطرة ..

لا يصير صوتك واطي مرره لدرجة اللي قدامك ما يسمعك ويسألك وش تقولين.. و لا يصير صوتك عالي لدرجة ان الواحد يحسبك تصارخين او يقولك قصري صوتك

فيه نقطة ( توازن) بالنص .. دوريهاوراح تلقينها

3-اوزني اعصابك و ردود افعالك حسب الموقف

الثبات الإنفعالي يعطي الأنثى هيبة وغموض عجيب + يخلي اللي حولك يتأثرون فيك ويثقون بقراراتك وتصرفاتك ويعطونك سلطة اكبر عليهم.. ( اللي حولك يعني اي احد حتى اهلك او زوجك او ابنائك

طبعا راح تمر عليك مواقف كثير باليوم ممكن تستفزك بس لا تصيرين ( سهلة الإستفزاز) على اشياء تافهه عشان لا تفقدين توازنك..ردة الفعل الحادة او المبالغ فيها تدل ان الوحده ماعندها توازن او تقدير للموقف + شخصيتها هشه و ضعيفه .. هالشي يخرب عليك انوثنك

4-اوزني كلامك واوزني سكوتك..

لا تتكلمين كلام لهدف الكلام بس.. يعني كلام موب مهم ولا له قيمة ولا معنى لا يضيف لك شي ولا يضيف للي قدامك شي..تعلمي تسكتين وما تتضايقين من السكوت..

السكوت يخليك تسمعين اللي قدامك زين وهالشي يساعدك تفهمين الناس اسرع . كلامي هذا ما يعني طبعا انك ماتسولفين ولا تتفاعلين مع اللي حولك اللي اقصده لا يصير كلامك كثير عشان لا يفقد قيمته..

دائما قولي ( اقل من اللازم)، هذه الحركه لو ضبطتيها راح تنبهرين بالفرق لأنك راح تصيرين اذا تكلمتي الجميع يسكت ويسمع، يعني راح تزيد سلطتك وتأثيرك بشكل ناعم وغامض

5-اوزني حركات جسمك ونظرات عيونك..

حركاتك ونظراتك ( لغة لحالها بدون ما تتكلمين.. تقول عنك اشياء كثير، خاصة بالأماكن العامة او المجالس او مكان العمل او الدراسة.. كل ما وزنتيها اكثر، كل ما صار حضورك بالمكان راقي و ساحر اكثر..

من حركات ونظرات بعض البنات وعيونها اللي تلاقط تعرفين انها خفيفة، و ملقوفة، و فضولية.. وهالصفات ضد احساس الأنوثه الطاغي اللي يخلي الآخرين يحترمونك ويتأثرون فيك ويحسبون لك حساب